S. Norberti, episcopi
Die 6 iunii
S. Norberti, episcopi
Deus, qui beatum Norbertum episcopum Ecclesiae tuae oratione ac pastorali zelo ministrum eximium effecisti, praesta, quaesumus, ut, eius interveniente suffragio, fidelium grex pastores iuxta cor tuum et salutaria pascua semper inveniat. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Natus est circa annum 1080 in regione Rhenana. Canonicus Ecclesiae Xantensis, a vita mundana conversus, amplectitur vitam regularem et sacerdotio initiatur anno 1115. Vitam apostolicam aggressus, praedicationis munus suscepit, praesertim in Gallia et in Germania. Sociis sibi adscitis, fundamenta iecit Ordinis Praemonstrantensis ac nonnulla fundavit monasteria. Archiepiscopus Magdeburgensis electus anno 1126, vitam christianam reformavit et fidem ad gentes ethnicas viciniores extendit.
Obiit Magdeburgi die 6 iunii 1134. Canonizatus est anno 1582, eiusque festum ascriptum est in Calendario romano anno 1620.
