S. Teresiae Benedictae a Cruce, virginis et martyris
Die 9 augusti
S. Teresiae Benedictae a Cruce, virginis et martyris
In Europa:S. Teresiae Benedictae a Cruce, virginis et martyris
patronae Europae
Festum
Deus patrum nostrorum, qui beatam Teresiam Benedictam martyrem ad cognitionem Filii tui crucifixi eiusque imitationem usque ad mortem perduxisti, ipsa intercedente concede, ut omnes homines Christum Salvatorem agnoscant et per eum ad perpetuam tui visionem adveniant. Qui tecum vivit et regnat in unitate Spiritus Sancti, Deus, per omnia saecula saeculorum.
Nata est Breslaviae (Wrocław, Breslau) in Germania anno 1891 et, in iudaica religione nata et instituta, aliquot annos magnas inter aerumnas philosophiam egregie professa est. Vitam novam in Christo per baptismum suscepit et, Teresiae Benedictae a Cruce nomine accepto, inter Carmelitas Discalceatas Coloniae (Koln), ubi secessit, prosecuta est. Tempore persecutionis, exsul in Nederlandia, in captivitatem trusa, anno 1942 in campum exitii Oświęcim seu Auschwitz prope Cracoviam in Polonia deportata est et mortifero vapore enecata.
Canonizata est anno 1998. Anno sequenti (1999) papa Ioannes Paulus II S. Teresiam una cum S. Birgitta patronam Europae declaravit.
