S. Bernardi Claraevallensis opera omnia
     PL 182           PL 183           PL 184           PL 185     
1117

HYMNUS DE S. MALACHIA. (MARTENE Amplissima collectio, tom. I, col. 746, ex ms. Veteris-Montis.)

1117 Nobilis signis, moribus suavis,

Meritis sanctus, inclytus triumphis,

Hodie carnis pondere levatus,

Migravit antistes.

Nec vacat viro Malachiae nomen,

Angelum sonans, Angelorum signat

Similem esse puritate vitae,

Gloria parem.

Angelus noster civium suorum

Redditus votis, sociatus choris,

Praeminet multis, coaequatur summis,

Merito quidem.

Sobrius victus, castitas perennis,

Fides, doctrina, animarum lucra,

Meritis parem coetui permiscet

Apostolorum.

Opere vicem, animo virtutem

Tenuit horum praesul et legatus,

Ac per hoc jure etiam honorem

Vindicat sibi.

1118 Signa si quaeras, quis referre queat?

Hoc tamen dico; manifesta satis

Mortua surgens quantus in hac parte

Fuit gloriae.

Christo regnanti sitne ulla nostri

Cura putamus, quos amavit prius

Pauperes, fovit humiles spiritu,

Humilis ipse.

Absit ab illo fonte pietatis

Sorte levata segnius manare:

Absit ut spernat miseros beatus

Orphanos pater.

O Malachia, Clara-Vallis tua,

Clarior tui corporis thesauro,

Postulat supplex te tuente frui

Pace perenni.

Gloria Patri Filioque ejus,

Gloria tibi, amborum Spiritus;

Una sit tibi, quia tres sunt unum,

Una majestas.