Immaculati Cordis Beatae Mariae Virginis
Sabbato
post dominicam II post Pentecosten
Immaculati Cordis
Beatae Mariae Virginis
Memoria
Deus, qui in corde beatae Mariae Virginis dignum Sancti Spiritus habitaculum praeparasti, concede propitius, ut, eiusdem Virginis intercessione, tuae gloriae templum inveniri mereamur. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Festum Immaculati Cordis B. Mariae Virginis institutum est anno 1944 a Pio XII, die 22 augusti celebrandum. In Calendario romano instaurato haec memoria, quae ab anno 1996 ut obligatoria habetur, celebratur postridie sollemnitatem Sacratissimi Cordis Iesu.
«In casu quo praedicta memoria, cuius dies celebrationis mobilis est ac dependens a die celebrationis Paschatis, eodem die occurrat una cum altera memoria obligatoria, illo anno hae duae memoriae tamquam ad libitum retineri debent, iuxta indicationes quae in Instructione Calendaria particularia diei 24 iunii 1970 relate ad calendaria particularia (n. 23c) inveniuntur» (Notificatio Congr. De Cultu Divino et Disciplina Sacramentorum, Prot. n. 2671/98/L).
