S. Romualdi, abbatis
Die 19 iunii
S. Romualdi, abbatis
Deus, qui per beatum Romualdum in Ecclesia tua eremiticam vitam renovasti, concede, ut, nosmetipsos abnegantes et Christum sequentes, feliciter ad caelestia regna mereamur ascendere. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Natus est Ravennae circa medium saeculi X. Vitam eremiticam aggressus, per plures annos terras peragravit, solitudinem quaerens et parvula monasteria aedificans. Contra pravos mores monachorum illius temporis strenue est renisus, dum exercitio virtutum ad perfectionis vitam contendit.
S. Romualdus obiit prope Ravennam die 19 iunii 1027. Canonizatus est anno 1032, eiusque festum ascriptum est in Calendario romano anno 1594, hac die celebrandum; sed anno sequenti (1595) in diem 7 februarii repositum est, qua die memoratur eius corporis translatio Fabrianum (1481).
