Ss. Protomartyrum Sanctae Romanae Ecclesiae
Die 30 iunii
Ss. Protomartyrum
Sanctae Romanae Ecclesiae
Deus, qui Romanae Ecclesiae copiosa primordia martyrum sanguine consecrasti, concede, quaesumus, ut firma virtute de tanti agone certaminis solidemur, et pia semper victoria gaudeamus. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
In prima persecutione contra Ecclesiam ab imperatore Nerone suscitata, post incendium Urbis anno 64 ortum, multi fideles occisi sunt atrocibus tormentis. De re testimonium perhibent scriptor ethnicus Tacitus (Annales,15, 44) et Clemens episcopus Romanus in epistola sua ad Corinthios (cap. 5-6).
Cum plura nomina antiquorum Martyrum in Calendario romano anno 1970 instaurato suppressa sint, introducta est postridie sollemnitatem Ss. Petri et Pauli memoria Protomartyrum S. Romanae Ecclesiae, tempore persecutionis Neronis occisorum in Circo Vaticano. Eorum festum in Urbe celebrabatur die 27 iunii ab anno 1923.
