S. Mariae Magdalenae de’ Pazzi, virginis
Die 25 maii
S. Mariae Magdalenae de’ Pazzi, virginis
Deus, virginitatis amator, qui beatam Mariam Magdalenam virginem, tuo amore succensam, donis caelestibus decorasti, da ut, quam hodie veneramur, eius puritatis caritatisque imitemur exempla. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Florentiae nata est anno 1566; pie educata et inter Sorores Carmelitas adscripta, absconditam vitam orationis et abnegationis duxit, pro Ecclesiae reformatione enixe precabatur, et sorores ad perfectionem direxit. Multis donis a Deo insignita, obiit die 25 maii 1607.
Canonizata est anno 1669. Anno sequenti (1670), eius festum ascriptum est in Calendario romano, hac die celebrandum; sed anno 1728, inducto festo S. Gregorii VII, translatum est in diem 27 maii et, anno 1899, ob festum S. Bedae, in diem 29 maii.
