Ss. Philippi et Iacobi, apostolorum
Die 3 maii
Ss. Philippi et Iacobi, apostolorum
Festum
Deus, qui nos annua apostolorum Philippi et Iacobi festivitate laetificas, da nobis, ipsorum precibus, in Unigeniti tui passione et resurrectione consortium, ut ad perpetuam tui visionem pervenire mereamur. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Philippus, Bethsaidae natus, prius discipulus fuit Baptistae, deinde Christum est secutus. Iacobus, sobrinus Domini, filius Alphaei, Ecclesiam Hierosolymitanam rexit; epistolam scripsit; vitam egit asperam et multos Iudaeos ad fidem convertit. Martyrio coronatus est anno 62.
Festum Ss. Philippi et Iacobi connexum est cum dedicatione basilicae romanae XII Apostolorum, die 1 maii peracta circa annum 570. Inducto S. Ioseph Opificis festo (1955), translatum est perantiquum festum Apostolorum in primam diem liberam, i.e. in diem 11 maii. In Calendario instaurato, dies 3 maii fit prima dies libera post memoriam S. Ioseph.
