«Oratio devota» — Auctor incertus
1323 ORATIO DEVOTA AD DOMINUM JESUM, ET B. MARIAM MATREM EJUS.
1323A 903 Summe summi tu Patris unice,
Mundi faber et rector fabricae,
Pietatis respectu deicae,
Peccatores afflictos respice,
Pie Pater.
Summa summi tu Mater Filii,
Clavem nostri tenens auxilii,
Fove tui lacte consilii
Peregrinos hujus exsilii,
Pia Mater.
Consolentur, o bone Domine,
Respirantes in tuo nomine,
Qui pro mundi tollendo crimine,
Dignatus es nasci de virgine,
Matris Pater.
1323B Consolentur, o bona Domina
Sitientes tua solamina,
1324A De qua sola felice femina
Praedicantur haec duo nomina,
Virgo Mater.
O figura Patris substantiae!
Tu es splendor paternae gloriae,
Tu es verum lumen justitiae,
De quo manat totius gratiae
Plenitudo.
O Regina regni Davidici!
Tu es virga floris Dominici!
Tu es arca panis angelici,
De quo nostra meretur refici
Solitudo.
Virtus Patris et sapientia,
Suaviter disponens omnia,
1324B Tu et Pater una substantia,
Aequus honor, eadem gloria
1325A Est utrique.
Stella maris, Regina saeculi,
Tu es Mater illius parvuli,
Quem adorant fideles populi,
Semper omnes et semper singuli,
Et ubique.
O sanctorum Sancte mirabilis,
Toti mundo desiderabilis,
Homo potens et Deus humilis:
Non est tibi nec erit similis,
Deus meus.
O sanctarum sancta dulcissima,
Sola tanto partu dignissima,
Ut de tua carne mundissima
Nasceretur majestas maxima,
1325B Homo Deus.
Jesu Christe, fons indeficiens,
Fons humana corda reficiens,
Te suspiro, te solum sitiens:
Solus eris mihi sufficiens,
Fili Dei.
Mater Christi, decus virgineum,
Thronum sedens super aethereum:
Nomen tuum sapore melleum,
Liquefacit affectum ferreum
Cordis mei.
Summum bonum plenum dulcedine,
Verum lumen de vero lumine,
Solo cujus audito nomine,
Satiatur mira pinguedine
1325C Cor justorum.
Summi boni reclinatorium,
Dulcis vini dulce cellarium,
Quod indulcans dulcedo dulcium,
Praeelegit sibi in proprium,
Rex coelorum.
Patrum Pater praecelse caeteris,
Reparator humani generis:
O qui carnem pro nobis miseris
Mulieris de carne pauperis
Assumpsisti.
Matrum Mater et Virgo virginum,
Apotheca salutis hominum,
O, quae munda de carne Dominum,
Sine carnis mixtura seminum
1325D Concepisti.
Audi, precor, o qui das gratiam!
Peccatoris hujus miseriam,
Et per tuam misericordiam,
Peccatorum meorum veniam
Mihi dona.
Audi, precor, o plena gratia,
Peccatoris hujus suspiria,
Et pro tua misericordia
Deo meo me reconcilia,
Mater bona.
Tibi, Pater, fac beneplacitum
Peccatoris istius gemitum,
1326A Solve mei reatus debitum
Quia malum protendo meritum,
Et protendi.
Tibi, Mater, fac acceptabilem
Peccatoris hanc vocem flebilem.
Redde mihi Deum placabilem,
Ne se praestet inexorabilem,
Quem offendi.
O intactae Fili puerperae,
Audi planctus animae miserae,
Quae peccati jacens in pulvere,
Ut jumentum se computrescere
Lamentatur.
O intacta Virgo puerpera.
Ad te clamat mens mea misera,
1326B Quae nefanda semper ad scelera
Ab aetate nunc usque tenera
Effrenatur.
Pie Pater, errantem corrige,
Piam manum labenti porrige,
Jam de luto me faecis erige,
Et in viam tuorum dirige
Mandatorum.
Pia Mater, orantem visita,
Pio corde de me recogita,
Coram Jesu benigno clamita,
Ut meorum remittat debita
Peccatorum.
Esto nobis, Pater, propitius,
Quorum frater es atque socius:
1326C Te laudamus, te benedicimus,
Adoramus atque diligimus
Mente tota.
Esto nobis, Mater, propitia,
Quorum soror es atque socia:
In tuarum laudum praeconia,
Corda nostra fac voluntaria,
Ac devota.
Benedicte Creator omnium,
Benedicas mentes fidelium,
Nomen tuum benedicentium,
Mortis tuae per beneficium
Quos salvasti.
Benedicta tu in mulieribus
Benedic te benedicentibus,
1326D Benedictis tuis uberibus,
Qui dat escam esurientibus,
Quem lactasti.
Laus et honor sit Dei Filio,
Salus, virtus et benedictio,
Benedicta sit incarnatio;
Mors illius et resurrectio
In aeternum.
Benedictus sit Pater luminu
Benedicta sit Virgo virginum,
Benedicat cor meum Dominum,
Sitiatque fontem dulcedinum,
Sempiternum. Amen. PROSA DE NATIVITATE DOMINI.1327
1327 904 Laetabundus
Exsultet fidelis chorus,
Alleluia.
Regem regum
Intactae profudit thorus;
Res miranda.
Angelus consilii
Natus est de Virgine,
Sol de stella.
Sol occasum nesciens,
Stella semper rutilans,
Semper clara.
Sicut sidus radium,
Profert Virgo Filium
1327 Pari forma.
Neque sidus radio,
Neque Mater Filio,
Fit corrupta.
Cedrus alta Libani
Conformatur hyssopo,
Valle nostra,
Verbum ens Altissimi
Corporari passum est
Carne sumpta.
Isaias cecinit,
Synagoga meminit
Nunquam tamen desinit
Esse caeca.
1328 Si non suis vatibus,
Credat vel gentilibus,
Sibyllinis versibus
Haec praedicta.
Infelix, propera,
Crede vel vetera;
Cur damnaberis,
Gens misera?
Quem docet littera,
Natum considera
Ipsum en genuit
Puerpera.
Amen.
