S. Iosaphat, episcopi et martyris

Die 12 novembris

S. Iosaphat, episcopi et martyris

Memoria

Excita, quaesumus, Domine, in Ecclesia tua Spiritum, quo repletus beatus Iosaphat animam suam pro ovibus posuit, ut eo intercedente, nos quoque eodem Spiritu roborati, animam nostram pro fratribus ponere non vereamur. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.

Natus est in Ucraina circa annum 1580 ex parentibus orthodoxis; fidem catholicam amplexus, inter monachos sancti Basilii adlectus est. Sacerdotio insignitus et episcopus Polocensis (Polock) electus, mirum in modum unitati Ecclesiae studuit. Ab hostibus ad necem petitus, die 12 novembris anni 1623 martyr occubuit Vitepsci, in Belorussia.

Canonizatus est anno 1867, eiusque festum ascriptum est in Calendario Romano anno 1882, die 14 novembris celebrandum.