S. Elisabeth Lusitaniae
Die 4 iulii
S. Elisabeth Lusitaniae
Deus, auctor pacis et amator caritatis, qui beatam Elisabeth mira dissidentes componendi gratia decorasti, da nobis, eius intercessione, pacis opera exercere, ut filii Dei nominari possimus. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Aragoniae regibus orta, nata est anno 1271; puellula regi Lusitaniae nuptui tradita, duos peperit filios. Aerumnas et difficultates fortiter sustinuit orando et opera caritatis exercendo. Viro defuncto, bona pauperibus distribuit et habitum Tertii Ordinis S. Francisci suscepit. Dum pacem firmaret inter filium et generum, morte occubuit anno 1336.
Elisabeth obiit Stremotii, in Lusitania, die 4 iulii 1336. Canonizata est anno 1626, eiusque festum ascriptum est in Calendario romano eodem anno die 4 iulii celebrandum, sed anno 1694 translatum est in diem 8, extra octavam Ss. Apostolorum.
