In Dedicatione Basilicae S. Mariae
Die 5 augusti
In Dedicatione Basilicae S. Mariae
Famulorum tuorum, quaesumus, Domine, delictis ignosce, ut, qui tibi placere de actibus nostris non valemus, Genetricis Filii tui intercessione salvemur. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Post concilium Ephesinum (431) in quo mater Iesu Deipara acclamata est, Romae in Esquiliis a Xysto III (432-440) erecta est basilica in honorem Sanctae Dei Genetricis dicata, et postea «Sancta Maria Maior» nuncupata. Haec est in occidente antiquior ecclesia in honorem beatae Mariae Virginis dedicata.
Dedicatio Basilicae S. Mariae die 5 augusti, tempore Xysti papae III, recensetur in Martyrologio hieronymiano. Legenda fundationis basilicae S. Mariae Maioris hanc memoriam localem sub titulo «Dedicationis B.M.V. ad nives» pervulgavit saeculo XIV. Festum ascriptum est in Calendario romano anno 1568.
