In Visitatione Beatae Mariae Virginis
Die 31 maii
In Visitatione Beatae Mariae Virginis
Festum
Omnipotens sempiterne Deus, qui beatam Virginem Mariam, Filium tuum gestantem, ad visitandam Elisabeth inspirasti, praesta, quaesumus, ut, afflanti Spiritui obsequentes, cum ipsa te semper magnificare possimus. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Festum Visitationis B. M. V., ab Urbano VI institutum anno 1389 ad obtinendam finem schismatis Occidentis, ascriptum est in Calendario romano die 2 iulii agendum, qua die a Franciscanis inde ab anno 1263 celebrabatur. Translatum est anno 1970 in ultimam diem mensis maii, inter sollemnitates Annuntiationis Domini et Nativitatis S. Ioannis Baptistae, quo aptius consentiat narrationi evangelicae.
