S. Bernardi, abbatis et Ecclesiae doctoris
Die 20 augusti
S. Bernardi,
abbatis et Ecclesiae doctoris
Memoria
Deus, qui beatum Bernardum abbatem, zelo domus tuae succensum, in Ecclesia tua lucere simul et ardere fecisti, eius nobis intercessione concede, ut, eodem spiritu ferventes, tamquam filii lucis iugiter ambulemus. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Natus est anno 1090 prope Divionem (Dijon), in Gallia. Pie educatus anno 1111 monachis Cistercensibus se adiunxit, et paulo post abbas monasterii Claraevallis electus, sodales actione et exemplo ad virtutes excolendas egregie direxit. Propter schismata in Ecclesia exorta, Europam peragravit ad pacem restituendam et unitatem. Multa scripsit ad theologiam et rem asceticam pertinentia.
S. Bernardus obiit in monasterio Claraevallis die 20 augusti 1153. Canonizatus est anno 1174, eiusque festum ascriptum est in Calendario romano saeculo XIII.
