S. Martini, papae et martyris
Die 13 aprilis
S. Martini, papae et martyris
Da nobis, quaesumus, omnipotens Deus, adversa mundi invicta mentis constantia tolerare, qui beatum Martinum papam et martyrem nec minis terreri nec poenis passus es superari. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Tuderti (Todi), in Umbria, natus et inter clericos Romanos adscriptus, anno 649 ad Petri cathedram electus est. Eodem anno concilium celebravit, in quo error monothelitarum damnatus est. Ab imperatore Constante captus anno 653 et Constantinopolim delatus, multa perpessus est; denique in Chersonesum translatus, ibi anno 656 mortuus est.
Testimonia ex eius Vita graeca deprompta S. Martinum I obiisse in Crimea die 13 aprilis (656) indicant. Hac die recolitur eius memoria in ritu byzantino. Martyrologium Adonis depositionem S. Martini die 12 novembris refert, postridie festum S. Martini Turonensis, qua die eius festum Romae celebratur inde a saeculo XI.
