S. Mariae Goretti, virginis et martyris
Die 6 iulii
S. Mariae Goretti, virginis et martyris
Deus, innocentiae auctor et castitatis amator, qui famulae tuae Mariae iuvenili aetate martyrii gratiam contulisti, da nobis, quaesumus, eius intercessione, in tuis mandatis constantiam, qui dedisti certanti virgini coronam. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Nata est Corinaldi in Italia anno 1890 ex paupere familia. Prope Neptunum pueritiam transegit asperam, matrem adiuvans in re domestica; piam indolem cum haberet, in oratione assidua erat. Die 6 iulii 1902, ad castitatem tutandam contra aggressorem, mori maluit quam foedari et pugionis ictibus confossa est.
Canonizata est anno 1950.
