S. Caroli Borromeo, episcopi
Die 4 novembris
S. Caroli Borromeo, episcopi
Memoria
Custodi, quaesumus, Domine, in populo tuo spiritum, quo beatum Carolum episcopum implevisti, ut Ecclesia indesinenter renovetur, et, Christi se imagini conformans, ipsius vultum mundo valeat ostendere. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Natus est Aronae in Longobardia anno 1538; post adeptam in utroque iure lauream, ab avunculo Pio IV inter cardinales cooptatus est et episcopus Mediolanensis electus. Verus sui gregis pastor effectus, totam dioecesim pluries lustravit, synodos collegit, multa ad animarum salutem decrevit, christianos mores omnino fovens.
S. Carolus obiit Mediolani die 3 novembris 1584. Canonizatus est anno 1610, eiusque festum ascriptum est in Calendario romano anno 1613, die 4 novembris celebrandum.
