S. Francisci Xavier, presbyteri
Die 3 decembris
S. Francisci Xavier, presbyteri
Memoria
Deus, qui beati Francisci praedicatione multos tibi populos acquisisti, da ut fidelium animi eodem fidei zelo ferveant, et uberrima ubique prole Ecclesia sancta laetetur. Per Dominum nostrum Iesum Christum, Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.
Natus est in Hispania anno 1506; cum Parisiis litteris studeret, sancto Ignatio sese iunxit. Romae sacerdotio initiatus est anno 1537 et in opera caritatis incubuit. Anno 1541 in Orientem profectus, Indiam et Iaponiam per decem annos strenue evangelizavit multosque ad fidem convertit. Mortuus est in Sinarum insula Sanciana die 3 decembris 1552.
Canonizatus est anno 1622, eiusque festum ascriptum est in Calendario romano anno 1663.
